হাঁহি - কবিতা

হাঁহি
====
তাইৰ হাঁহিমুখীয়া ফটোখন
সেইযে চচিয়েল মেডিয়াত জিলিকিছে
তাইক কয়, ইমান হাঁহিব পাৰা?
তাইৰ কোনো নাই নেকি সমস্যা
আনুমানিক পাৰিবাৰিক শান্তিক কৰে হিংসা৷
তাইৰ পাটৰ কাপোৰযোৰ জিলিকিছে
কপালত জিলমিল জোন জলা!
হাতৰ মুঠিখাৰুপাতো সোণখটোৱা!
সপ্তাহান্তিক এখন নতুন ফটো ওলমে
বিৰিয়া গজা দাঁতবোৰ পুনৰ জিলিকে
হাঁহিমুখীয়া ফটোত শতাধিক লাইক পৰে
“ধুনীয়া লাগিছে“
লিখি উঠি সিহঁতে ভাবে,
ইমান সুখী তাই!
ইমান ধুনীয়া তাই!!
হস্পিটেলত কেমো’ দিয়াজনে তাইক কয়
তাইৰ চুলিখিনি হেনো ঈৰ্ষণীয়৷
দুদিনীয়া আলহী চুলিকিদাল লাৰি
তাই এটা মিচিকি হাঁহি মাৰে৷
======

আৰু এটি গীত

মই এখনি গাঁৱত থাকো

মোৰ গাঁৱত ফুলে সোণাৰু

মোৰ গাঁৱৰ একাবেঁকা আলিৰে

মোৰ আবেলিবোৰ সামৰোঁ৷

মোৰ পদূলিৰ হাচনাহানা

জাকৰুৱা আকাশীতৰা

তাৰে মাজতে মই ফুৰো

এই মোৰ কল্পনাৰ পঁজা৷ 

মোৰ মনৰ গাওঁখনি

মৃত্যুতকৈয়ো আজি শীতল

মোৰ নীৰসিক্ত নয়নত

আৰু নজ্বলে দাবানল

গাৱঁৰ বাটৰুৱাই কৈছিলে

হাইতাল পিন্ধা মই এটি বেলি

মোৰো পদূলিত আছিলে

এটি মিচিকিয়া গধূলি

হাৰি হাৰি জিকিলে

কেনেকুৱা লাগে নাজানো

গোটেই জীৱন হাৰিলো

মৃত্যুকো জানো জিনিলো? 

আঁউসীটোৱে যেতিয়া মাতিলে

গাৱঁৰ সকলো আছিলে শুই

থৈ আহিলো হিয়াখন মনে মনে

লৈ আহিলো একুৰা উজাগৰী জুই

জুইত পুৰিছো আজি সপোনবোৰ

খালি কৰো আকৌ ভৰে

আকৌ উভটনি ধূসৰ ছাঁইবোৰ

মোক এখন বগা কাপোৰ লাগে

ঢাকি দিয়া মোৰ সপোনবোৰ

শেষযাত্ৰাত মোক তুমি আহি 

দিবানে শেৱালি এপাহি সোণ? 

I AM DONE

গীত

ৰচনাঃ ফেব্ৰুৱাৰী ৭, ২০১৯

শুচি
===

ফৰকাল আবেলি আহিলি

নিয়ঁৰো নামিল

ধুনীয়া ধৰণী কৰি শুচি

ৰ’দঘাই দিনটি সামৰি

অৱসাদ পেলালি মুচি

হেঙুলীয়া আকাশী মন

ছাঁতে আছিলি লুকাই

সেমেকিল দুবৰি বন

সাৰ পালে অ’ জোনবাই, 

বেলিও লুকালে কুচিমুচি

ধৰণী কৰি শুচি৷

সন্ধ্যাচলৰে বগলীজাকে

কিনো কবিতা ৰচে

মানসী চিনাকি ভাষাৰে

পাহাৰৰ ভাঁজে ভাঁজে,

আকাশেও হাঁহিলে মিচিকি

ধৰণী কৰি শুচি৷