Sunday, January 19, 2014

ভগৱান এটি অনুভূতিৰ নাম

ভগৱান এটি অনুভূতিৰ নাম
~~~~~~~~~~~~~~~~

আপোন কোনোবাজন যেতিয়া হেৰাই যায়
বা‍ঞ্ছিত ন্যায়প্ৰাপ্তিৰ পৰা বঞ্চিতা হৈ
সেই অনুভূতি হেৰুৱায় একোটি অভিমানী মনে।

ভগৱান এটি অনুভূতিৰ নাম

উজাগৰী নিশা হয়তো পুনৰ স্বৰ্গীয় ৰূপ লয়
শুই থকা নিষ্পাপ মুখনি একোখনিৰ আলম লৈ
সপোন আঁকোৱালি যেতিয়া পূজে এটি মাতৃমনে।


ভগৱান কোনো বিতৰ্কৰ মাধ্যম নহয়


বিচাৰিলে আছে, নিবিচাৰিলে নাই 
বিশ্বাসৰ ভেজাত উদিত এটি অনুভূতি
যি নামেৰে যেনেকৈ মাতে যাৰ জীৱনে৷

Thursday, January 9, 2014

পানীটেঙা

পানীটেঙা

--------
অমুকীৰ বিনম্ৰ অনুমান (আচলতে আৱিষ্কাৰেই সৰু-সুৰা) যে টেঙাৰ নাম শুনিলেই মুখলৈ পানী অহাসকলৰ অন্যতম প্ৰিয় খাদ্য পানীটেঙা পাৰে!  আৰু যদি নহয় তেওঁলোকে হয়তো পানীটেঙা  খায়েই পোৱা নাই আৰু জীৱনত কি হেৰুৱাইছে বুজিয়েই পোৱা নাই কিজানি! এইবিধ টেঙা কেৱল বজাৰতেই নহয় জুতি লগাই খাবৰ মন থাকিলে বিশেষ কষ্ট নকৰাকৈ ঘৰতে তৈয়াৰ কৰি ল’ব পাৰি৷ অলপতে মৰমৰ  মাতৃদেৱীয়ে শিকাই থৈ যোৱা এটি সাধাৰণ তত্বৰ প্ৰয়োগ কৰি দুবাৰকৈ পানীটেঙা প্ৰস্তুত কৰি অমুকীয়ে জিভা-ধন্য কৰিছো৷ প্ৰথমবাৰতকৈ দ্বিতীয়বাৰ আৰুয়েই বেছি গদগদ হোৱাৰ পিছত ৰাইজক জনোৱাৰ সাহস কৰিছো৷ এই বিধিমতে তৈয়াৰ কৰি খাই ভাল পাবই, তথাপিও বেয়া পালে অমুকীলৈ নমুনা পঠাই দিব, বিনামূলীয়া গূণগত পৰীক্ষাসহ ফেচবুকত “তামাম” বুলি লিখি ফটো ওলমাই ধন্যবাদ দিয়া হ’ব৷

এতিয়া আহোঁ তত্বগধুৰ মূল কথাখিনিলৈ –
১) ঘৰত সৰিয়হৰ গুটি আছেনে? ক’লাবিধ হ’লে ভাল নাইবা ক’লা – বগা দুয়োবিধেই মিহলাই ল’ব পাৰে৷ এবাতিমান ধুই তিয়াই থওক কেইঘণ্টামান৷ মুখৰ পানী ৰখাব নোৱাৰা সকলে ধুই নথ’লেও হ’ব কেৱল পিছোতে বেছি সময় লাগিব৷
২) ঘৰত টেঙা কি আছে? তেতেলি আছে যদি কথাই নাই৷ গুটি গুছাই লওক কেইটামান ঠেতেলিয়াই৷ নহ’লে থেকেৰা (শুকান হ’লে তিয়াই থওক কেইঘণ্টামান) বা টেঙাআম ও ল’ব পাৰি৷ মোৰ দখলত ইয়াৰে এবিধো নথকাত গোলনেমুৰ ৰসকে উলিয়াই লৈছিলো৷ কামটো কিমান নিষ্ঠাৰে কৰা হয় সেইটোহে আচল কথা বুলি ভাবো৷
৩) ভালদৰে সৰিয়হখিনি, টেঙাখিনি আৰু কেঁচা জলকীয়া কেইটামান একেলগে মিলাই পটাত বা “ব্লেণ্ডাৰ”ত মিহিকৈ পিছক৷ পাকঘৰলৈ কোনোবা সোমাই আহি যদি তেতিয়া কয়ঃ “ওহ নাকত ধৰি গৈছে কি কৰি আছ?” তাৰ মানে অমৃতবিধ গুণগত পৰীক্ষাত প্ৰায় উত্তীৰ্ণ হৈয়ে গ’ল বুলি ধৰিব পাৰে৷
৪) মিশ্ৰণখিনি নিমখ সোৱাদ অনুসাৰে মিহলাই কলপাতত মেৰিয়াই বান্ধি এদিন বা দুদিন থৈ দিয়ক৷ কলপাতখন খাবৰ বাবে নহয় গতিকে পাত নেথাকিলে শুকান পাত্ৰ এটাত ঢাকি থ’লেও হ’ব৷ কলপাতৰ পৰা লৈ খোৱাৰ মজাটো অলপ বেলেগ যেনিবা৷ এতিয়া ভাতৰ লগত অলপ অলপ কাঁহীৰ দাঁতিত লৈ পৰিবেশন কৰক৷
চাব আকৌ তৈয়াৰ কৰোতে যদি অলপো পানী মিহলি হৈছিল, মিশ্ৰণটো তিতা হৈ যাব পাৰে৷ তেতিয়া ঘৰত যদি সৰিয়হৰ শুকান গুড়ি আছে মিহলাই এদিন বা দুদিন থৈ দিলে তিতাভাৱটো নোহোৱা হ’ব লাগে৷
খাই কেনে পালে কষ্ট কৰি জনাব নেলাগে বাৰু, দয়াকৰি অলপ নমুনা পঠাই দিলে নিজেই জানিব পাৰিম৷
বিঃ দ্ৰঃ – পানীটেঙাৰ আচল প্ৰস্তুত-প্ৰণালী ইয়াতকৈ অলপ বেলেগ হ’ব পাৰে কিন্তু এই তত্ত্বই জিভাক নিৰাশ নকৰে বুলি বিশ্বাস৷

ধন্যবাদ৷